ما بعد القبل

مش هاقدر افتكر امتى بالظبت ... بس اللي انا متأكد منه انه حصل ... و ما كنتش فاهم ليه حصل كده .. شعور غريب ما بتعرفوش غير لما تحسه .. و مش هاتحسه غير لو عرفته .. دايرة مغلقه بدايتها عند اول ركن فيها لو عرفت تلاقيه !! عشان كده مالهاش بدايه!! و نهايتها هاتلائيها لو لقيت الركن اللي المفروض تبدأ من عنده ...
بنبدئها غصب عننا و احنا مبسوطين و بننهيها بمزاجنا و احنا مش طايقين .. معنايين عكس بعض بس " و بأضادها تعرف الأشياء " .


انا شاب لكن عمري ولا الف عـــــــــــــام
وحيد .... لكن بين ضلوعي زحـــــــــــــام
خايف.... بس خوفي مني انا
اخرس ... بس القلب مليان كلام


هو شعور بتحسه لما تكون مش عايز تحس بحاجه ... و بتعيشه و انت ميت و بتفكر فيه و انت نايم و بتنام و انت بتفكر فيه و بتهرب منه عشان تلاقيه و اول ما تلاقيه تحس انك لاقيت حاجه و فجأه .............. تسرح فيه ... و لو فكرت للحظه ... للحظه ... هاتلائيك عارف الحل .. و عارفه كويس جدا ... بس مش عايز ... عشان انت مبسوط باللي انت فيه.


إقلـع غمـاك يـا تـور وارفض تلـف
إكسـر تـروس السـاقيـة واشـتم وتف
قال : بس خطوة كمان . . وخطوة كمان ..
يا اوصـل نهـاية السـكة يا البير يجف


ارفض ... انت مستني ايه ... مستني حد يجي يرفضلك ... و يقلك ايوه ... هو ده اللي المفروض انك تعمله برافو عليك ... لا يا بابا ... ارفض .. اتعلم تقول لأ ... اوعى تندم ... اوعى تنسى اللي عملوه فيك ... اعفوا ... بس ما تغفرش .... اسكت ... بس ما تنساش ... افتكر كويس ... مهما قالولك انهم بيحبوك او انك بالنسبالهم المثل و القدوه و انك احسن حاجه حصلت و انك الرجل الصح في الوقت الغلط ... قلهم لأ ... انا الراجل الصح في الوقت الصح ... انا الشمس و انتو هتلفوا حواليا ... احتياجي ليكم كان ضعفي ... و انا دلوقتي مبقتش اعرف الضعف ...


لو قالولك الخطأ صفه بشريه ..... قلهم ... هاا ... و المغفره صفه إلاهيه...


انزل دلوقتي عند اقرب طاغيه " كتير جدا " و اشتري منه برج عاجي عشان تعيش فيه ... انزل حالن عند اقرب مستبد " اكتر من الطغاه " و اشتري ودن من طين و ودن من عجين .... انزل عند اقرب حلاق " متوفرين برضه " و اشتري مقص .. عشان تقطع شعره معاويه ... اذهب الى اقرب كباريه " شارع الهرم " و ارتكب ما استطعت من الذنوب .. اشرب .. العب .. ازني .. اقتل .. اسرق .. و اذا سألت اين كنت قلهم كنت في دار العباده بطلب الغفران ... حتى تكون قد ارتكبت كل الذنوب في ذنب واحد ... الكذب .. الذي ما ان اتقنته .. فقد اتيت جوامع الشر.

اهنيك ... انت الأن واحد من اهل الأرض لسا فاضلك شوية حاجات هاتيجي مع الوقت ... الكبر طبعا لا غنى عنه .. الغرور .. مش بطال ... و عنما تصل للجحود ... فقد اكملت المنظومه ... هنيئأ لك جنة الأرض.


نأتي بشخص متربي و شخص غير متربي .... ثم نضيف اليهم كل وسائل الفساد .. مال .. جاه .. سلطه .. نفوذ .. و نضرب المزيج جيدا في خلاط الأيام مع بعض اضافات الحقد و الحسد على حسب التكوين البشري لكل مواطن ... و نترك المزيج مدة من الزمن ... هاتشوف العجب ... الطاجن المتربي هاتلاقي فساده عدى الحدود و الطاجن المش متربي هتلاقي فساده على قده ... اصل المش متربي مترباش اصلا .. يعني لو بيعمل الغلط بيعمله و هو مش عارف ... بس المتربي بقا ... يا سلام .. هو في احسن من ان الواحد يعرف الغلط ايه عشان يعمله .. و يبقا بيعمله بمزاج و فن ... و يخترع فيه كمان ..

- نستفيد ايه من التجربه دي ؟؟؟

- محدش يربي ولاده ... عشان كده كده هايفسدوا ... يبقا نخليهم فاسدين مش متربيين احسن ما يبقوا فاسدين متربيين ... و بعدين كمان عشان تضييع وقت.


أنـا إلـه الـوجــد رب الـهيــام
أضـرب بسـهم الوهـم وهــم الغـرام
وهــم الغــرام مـن كتر مـا هو لذيذ
رشـقت انـا ف صـدرى جمـيع السـهام