حرر بتاريخ ٤/٣/٢٠٠٩و' لم يتم النشر وقتها لأسباب زالت الآن.. فقررت النشرغمضت عيني .... قررت اني و لأول مره اني ازعل ... كل مره كان بيحصلي حاجه كنت بزعل .. بس كنت بزعل من نفسي ... قررت ولأول مره اني اغضب ... كل مره كان بيحصلي حاجه ( غير الحاجه اللي فوق ) كنت بغضب ... بس كنت بغضب من نفسي ... اخيرا قررت ازعق ... كل مره كان يجرالي فيها حاجه غير الحاجتين اللي فوق دول كنت بزعق .... بس بزعق لنفسي ... قررت اخيرا اني احاول اوصل للناس اللي انا حاسه .. بدل ما انا مش لاقي حد اوصلهولوا الا نفسي
اوعى تتحجج ... هتلاقي ترابنتين حجه تقولها لنفسك عشان تقنع نفسك انك ما تعملهاش المره دي كمان ... عييييييب .. محدش اتعود منك على كده .... يعني انت عايز تبقا زي كل الناس ... انت مختلف يا بابا ... ( طبعا مختلف .. ودانك اطول ) .. مش يمكن المره دي حد يحس بيك ... يا ابني لا يأس مع الحيااااه ( ثبت علميا ان لا يأس مع الحياء) .... الناس ليها الظاهر .. ( الظاهر بيبرس ) ...
يا أخي يولعوا بجاز وسخ
عارف لو قعدت تستنى الفرصه دي 100 سنه ... مش هاتجيلك غير دلوقتي ... اصعب واحد تكسبه في الدنيا هو اسهل واحد تخسره ... هو انت .... اخسر يا معلم براحتك ... بس ما ترجعش تلومني تاني .... كل مره تقعد تكلم معايا و تشرحلي الظروف اللي خلتك تعمل كده بصدقك ... بس ببقا فطسان من الضحك عليك .... يا حمار ... انت بتصدق الهبل اللي انت بتقوله ده ... خليك كده ... خليك لحد ما تعرف لوحدك ... ساعتها مش هاتلاقيني ... هابقا مبسوط فحححححححت و انا بتفرج عليك و انت بتضرب نفسك على قفاك .... يا ابني انا خلاص زهقت منك و رميت طوبتك شوف انت بقا تقدر تعمل ايه انا تعبت منك
أنا قـلبى كان شخشيخة أصـبح جـرس
جلجلت بـه صـحيوا الخـدم والحـرس
أنـا المـهرج . . قمتو ليـه خفتو ليـه
لاف إيدى سـيف ولا تحت مـنى فـرس
انت المهرج ... اخيرا فقت ... يا راجل ... اعمل حاجه بقا ... اتلحلح انزل روح نزلة السمان هاتلك فرس ولا فرسه حتى .. انزل روح عند اي خراط اخرطلك سيف ولا سنجه حتى .... على فكره مش هاتخسر اكتر من اللي انت خسرته ما تخافش ... ضربوا الأعور على عينه ... و بعدين اقلك حاجه ... دي ميزه مش عيب .. قلهم انه ما عندكش حاجه تخسرها ...
لا تحارب من ليس لديه شئ ليخسره
انت اللي عملته دلوقتي انك خيبت ظن ناس فيك عشان ترضي ناس تانيه ظنهم فيك هايخيب اول ما تحاول ترضي ناس تالته فا برضوا ظن الناس التالته هايخيب يوم ما تحاول ترضي ناس رابعه عشان ظنهم ما يخبش فيك و انت بترضي ناس خامسه ظنهم خاب فيك و انت بتحاول جاهدا ترضي الناس السابعه اللي غالبا هيكونوا فقدوا ثقتهم فيك عشان لقوك مهتم بالناس التامنه اللي زعلوا منك و انت بترضي الناس التاسعه اللي معجبهومش ان الناس العاشره يعملوا فيك كده و انت بترضي الناس الأولانين خالص .....
لو ركزت مش هاتلاقي ناس سادسه ....
عااااااااش ... رضيت الناس كلها و لا يا ترى .... زعلت الناس كلهاااااا ؟؟؟؟
من وجهة نظري الوضيعه اسمحلي اقلك ... انت عيل سييس ... ( يعني بتاع كمبيوتر و انترنت و كده ) ... ايوه عيل سييس .. مالك اتخدت كده لييه ... ده انا بقلهالك كده عشان على الملاء بس ... ده انا مش عايز اقلك انا عايز اقلك ايه اصلا و ان كنت عارف انك فاهمني و عارف انا عايز اقلك ايه ... وجهة نظري بئا ... انت لو حددت ناس معينه انت عايز ترضيها هاتزعل الكل ... لأن مفيش ناس عايزه زي ناس تانيه ابدا ... ايوااااا ... فتح الله عليك ....ما انت كويس اهه ... يبقا نشوف نقطه كل الناس مش هاتختلف عليها و نركز اننا نحاول نرضيها ... كويس جدا ... ايه هي النقطه دي بقا ؟؟؟؟؟؟؟؟؟؟؟؟؟
ساعتها بس فتحت عنيا عشان الاقي ان الساعه بقت 9 الصبح و اني لازم اقوم عشان البس و انزل الشغل.
Done, Wed 4/3/2009
No comments:
Post a Comment