الأوضه

عندما تبتعد الأشياء اكثر من اللازم فنحن لا نراها ... ولكنها اذا اقتربت اكثر من الازم في قد تحجب عنا رؤية اشياء اخرى اكثر اهميه ..


ايه الضلمه دي ... ايه ده ؟؟؟ في ايه ؟؟؟ انا ليه مش شايف حاجه ؟؟؟ انا فيين اصلا ؟؟ ... سواني ... لأ دي مش اوضتي ... انا مش فاكر اصلا ايه اللي حصل امبارح اخر جاجه ... لأ لأ افتكرت ... انا جيت من الشغل تعبان و دخلت نمت في اوضتي .. طيب انا فين دلوقتي .. انا لييه مش شايف ؟؟؟؟ طيب .. انا هستانى شويه لحد ما عيني تاخد عالضلمه و بعد كده هبدأ اشوف ....

.
.
.
.

انا عمري ما شفت ضلمه بالمنظر ده .. انا حاسس زي ما اكون اتعميت !!! ... طيب هو انا ليه مش سامع حاجه ... انا فيييييييين ... ؟؟!!

.
.
.
.

طيب انا هابدأ اتحرك واحده واحده كده و اشوف انا فين ... انا حاسس اني عارف المكان اللي انا فيه ده ... انا حاسس اني مشيت في الحته دي قبل كده ... ايوه .. انا عرفت ... انا اكيد اتخطفت ... ايوه هو اكيد اتخطفت ... و انا عارف مين عمل كده ... بس والله ما هاعملهم اللي هما عايزينه .. هايخوفوني يعني .. انا قلت مش بايع يعني مش بايع .... بس سواني .. معنى انهم دخلوا البيت انهم ممكن يكونوا خطفوا حد تاي معايا .. ممكن يكونوا خطفوها ..؟؟!!! ... انا مش عارف ...

.
.
.

ججججججججججججججججججججججججج


ايه الصوت ده ؟؟؟ هو في ايه هنا بالظبط ... انا مش عارف اعمل ايه ... يا ربــــــــــــــــــي ...

.
.
.

انا هاحاول افتح الباب براحه كده و اشوف اي حد ... باب ايه انت راخر الباب مقفول ... طيب ممكن اشوف اي مصدر للإضائه في الأوضه الغريبه دي اللي عمله زي التربه ... مش ممكن الضلمه دي ... انا مش شايف ايدي حتى ... بس .. انا مش عارف اقوم من مكاني اصلا .. اكيد انا متكتف .. مش عارف امشي ابعد من النقطه دي .. طيب انا هاعمل ايه يا ربي بس ... يا رب بس ما يكونوش عملوا حاجه في حد .

.
.
.

ايه ده .. انا سامع صوت رجلين بره .. ايه ده .. اكيد في حد داخلي الاوضه دلوقتي ... اكيد هايحاول يعذبني عشان ابيع .. انا لازم امسك نفسي .. بس لازم اعرف هما عملوا ايه فيهم ..

.
.
.

مين اللي دخل ؟؟ .. مين اللي فتح الباب ؟؟

في ايه يا حبيبي ؟؟ مالك قاعد عالأرض كده ليه ؟؟؟

حبيبي !!! .. انت مين ؟؟!! ...

في اي يا حبيبي مالك ؟؟ انا مراتك !!!

مراتي ازاي !! انا فين ؟؟ ..

انت في اوضة الأولاد ... انا بس كنت بوضب الشقه و كنت عايزه اوضب اوضة النوم فا قلت اوديك تنام في اوضة الأولاد عشان الدوشه ...

اولاد ... دوشه ... توضبي !!!! ... طيب انا ليه مش شايف ؟؟؟؟؟

انت مش شايف عشان انت لابس كمامة العين عشان اوضة الأولاد منوره فا ما كنتش هاتعرف تنام هناك ....

طيب ليه الباب مقفول عليا من جوه ...

حبيبي .. انت اصلا ما قمتش من مكانك عشان تجرب تفتحه ...

.
.
.

يملك الأنسان قدره عجيبه على اقناع نفسه بما يريد ان يقتنع به .. بل و يستطيع ايجاد كافة العوائق التي يستطيع بها ان يظل مقنعا نفسه بما يريد بشكل منطقي ... و دون ان يعلم احد عنها .. و لا حتى هو شخصيا :)

حق الرد

من السهل جدا ان نحسن التصرف و لكن بعد فوات الأوان


حبيبتي .. انا اسف .. انا عارف اني جرحتك و سببتلك الم كبير ..

انا عارف انك استحملتي مني اكتر من طاقتك ... و كتير كنتي بتيجي على نفسك عشان خاطري .. و انا ما كنتش حاسس بده ..

انا دلوقتي بس عرفت انت ايه .. عرفت اد ايه انت حاجه كبيره انا ما استهلهاش .. بس انت وقفت جمبي ..

انا دلوقتي بس عرفت ازاي ربنا بيبعتلنا حاجات و احنا مش بنشوفها غير لما تروح مننا ..

انا بجد اسف .. انا ما كنتش مقدر انت بتعملي ايه علشاني و علشانا ... ارجوكي تسمعيني .. انا عارف انك زعلانه .. و يمكن كمان مش عايزه تشوفي و شي ...

ارجوكي .. ارجوكي ردي عليا .. ما تسيبينيش اكلم نفسي ...

كنت دايما بتقوليلي انك هتصبري و تستحملي لحد الأخر ... و كان عندك دايما ثقه في ربنا ان كل حاجه هاتبقا كويسه ...

لييييه ... قوليلي لييييه .. ليييه مش بتردي ..

ارجوكي ما تسيبييش اكلم نفسي كده ... انا هاعمل كل اللي انت عايزاه ... انا مش ههزعلك تاني .. بس عشان خاطري ردي عليا ...

طيب انا هاقلك حاجه .. انا هامشي .. هاديكي ضاهري .. و انت ردي عليا براحتك ..

طيب اضرابيني .. اشتميني .. بس ارجوكي اتكلمي ... سكوتك بيقتلني ..

اعملي اي حاجه بس سامحيني ... سامحيني و مش هاتشوفي وشي تاني بعد كده ... ارجوكي سامحيني ..

انت ليييييييه مش حاسسه بيا ... كنت دايما بتقولي كده ... و انا ما كنتش حاسس بيكي .. بس انا دلوقتي حسيت ... و الله العظيم حسيت ... ابوس ايدك ردي عليا .. ابوس ايدك ردي عليا ...


بابا بابا .. اصحى يا بابا مالك .. في ايه .. عايز مين يرد عليك ..

امك ..

بابا .. ماما ماتت من 20 سنه ....

ما هي بقالها 20 سنه مش عايزه ترد عليا ..

اشكرك

كتير كانت تسألني .. انتم حاسيين بيا ... يعني انا فارقه معاكم .. و تفرح اوي اوي لما اقلها طبعا و احكيلها هي بتعمل معانا ايه و بتفرق معانا ازاي ..

في ناس كده .. مهما عملت تفضل حاسه انها مقصره .. مش عارفه تعمل ايه تاني .. عايزه تجيب اخر جهدها .. و برضه تفضل حاسه انها لسه ما عملتش حاجه ..

كتير بحس اني كده . بحس اني ما بعملش حاجه لحد .. او محدش حاسس بوجودي .. او اني مش فارق مع اللي حواليا .. بس هي .. لأ .. بتفرق جدا جدا جدا ..




عارف الحد اللي بتدور عليه اول ما تبقا مش عارف تدور على مين ؟؟

عارف الشخصيه اللي دايما تظهر في الوقت المناسب ؟؟

عارف الأنسان اللي عايزك ما تكلمش عشان هو فاهم سكاتك ؟؟

عارف لما تبقا خلاص .. على مشارف الأنهيار .. او تقريبا بدأت تقع .. و فجأة .. تحس انه بيلحقك يقلك رايح فين يا عم .. لسه بدري ..



علمتني معاني كتيره اوي .. علمتني ان الأمان ما ينفعش يكون مرتبط بوجود اي حد .. الأمان بالله وحده ... علمتني ازاي تكون خايف و مرعوب و تقريبا بدأت تهلوس من الخوف و فجأة تبقى حاسس براحه غريبه و مش فاضل غير انك تغمض عينك و تنام .. علمتني ازاي احس .. علمتني الأيمان .. خلتني احس بالقرأن ...




اشكرك .. على وقفتك جمبي من غير ما اعرف ..

اشكرك .. لأنك اثرتي فيا جدا من غير ما تحسي ..

اشكرك .. عشان في الوقت اللي محدش كان حاسس بيا .. " محدش" .. انت الوحيده اللي كنتي حاسه بيا ..

اشكرك .. عشان ما استنتيش مني "اي" حاجه في مقابل "كل" حاجه انت بتعمليها ..

اشكرك .. عشان انا لازم اشكرك .. و معرفش اعمل اي حاجه غير اني اشكرك .. عشان انا لا املك شئ غير اني اشكرك ..




كا نفسي اكون معاكي .. كان نفسي فعلا اكون معاكي النهارده ... كان نفسي اقلهالك كده و انا قدامك و بين ايديكي .. كان نفسي اقلك كل سنة و انت طيبه .. ايوه .. النهارده 19\3 .. النهارده عيد ميلادك .. النهارده عيد ميلادك يا أمي ..




أمي .. لا املك شئ في الدنيا يوازي اللي انت عملتيه ليا غير دعائي ليكي بالجنه ..

أمي .. كان بيبقا بيني و بين الأنهيار لحظات .. لحظات قليله جدا .. و بلاقيكي ظهرتي عشان تقلبي كل حاجه ..

أمي .. انا لما بشوف نظرة الحزن اللي في عينك و انا مسافر و احس قد ايه انت حاسه بالألم كنت بتمنى ما كنتش ابقى موجود من الأصل عشان ما تحسيش بكده ..

أمي .. انا بدعي من ربنا انه فرقتنا في الدنيا يعوضهلنا بي اجتماع في الجنه ...

أمي .. انا نفسي اطلب من ربنا اني ما اعيش يوم واحد من غيرك .. بس انا عارف قد ايه انت هتتعذبي في ده .. فا هاعمل زي ما بتقوليلي دايما و ادعي ان ربنا يعملنا اللي فيه الخير .. عشان كل ميسر لما خلق له ..

أمي .. طلب اخير .. ابوس ايدك .. ابوس ايدك .. اشفاعيلي يوم القيامه .. اصلي خايف من " وَاتَّبَعَتْهُمْ " ..




كل سنة و انت طيبه

بطاطس

- لأ .. قلتلك لأ .. مش كل مره هتمشي اللي انتي عايزاه ...انا قلت ميييت مره ان كلمتي هي اللي هتمشي في البيت ده ...

- طييييب .. انا مش قلت مش هاتنامي هنا ... اطلعي نامي بره بدل ما اطلعك بالعافيه ....

- بقلك اييييه .. مش معنى اني سكت لك كذا مره اني هافوتها المره دي ....

- ازااااي يا هانم البيت متبهدل كده ؟؟؟ ردددي عليا ما تسيبينيش اكلم نفسي كده زي المجنون !!!!

- مش كفايه اني انا اللي عملك الأكل بنفسي ... ارجع عشان الائي الدنيا متبهدله كده .... !!!

- انت كنت عامله حفله هنا ؟؟؟؟ ما هو مش ممكن عملتي كده لوحدك ؟؟؟

- بصيلي و انا بكلمك و سيبي اللي في ايدك ده !!!!

- و كمان بتتمطعي و بتتني و تتفردي عالأخر .... !!!

- ايييييه ده .. حتى الكتب ما سلمتش من المجزره دي ... ؟؟ !!!

- تصدقي اني انا الغلطان ... انا هارجعك مكان ما جبتك !!!!

- بطاطس !!! بطاطس !!! ابعدي عن رجلي

ميااااااااااوووووو

- ايوه .. ما هو ده اللي انت فالحه فييه ... تناوناويلي شويه عشان اهدى و اسكت .. ما انا عبيط اصلي .. بس بعينك المره دي يا بطاطس .. بعينك ..

ياسين

ياسين .. انت وحشتني اوي .. انا فعلا نفسي اشوفك دلوقتي .. بقالي فتره كده و انت واحشني اوي .. حاسس اني فعلا عايز اشوفك .. عايز اشوفك يا ياسين .. بس اكيد انت دلوقتي في مكان احسن .. و انا متأكد انه هايجيلي يوم و اشوفك .. اكيد انت كمان نفسك تشوفني .. بس انت عارف انه غصب عني والله يا ياسين ..

ياسين حبيبي .. انا بعمل كل حاجه عشان اشوفك في اقرب فرصه والله .. عارف .. كتير اوي بفضل اتخيل اوضتك عامله ازاي .. بتخيلك لابس ايه ... بتخيل ايه اللعب اللي عندك في اوضتك ... بتخيل انا بشتريلك ايه .. عارف .. كتير اوي بشوف هدوم نفسي اشتريهالك .. و حاجات نفسي اقولهالك .. و صور نفسي اصورهالك .. و اماكن نفسي اوديهالك ..

ياسين .. انت لو عايز بجد تعرف انا بحبك قد ايه ... شوف انا بحب امك قد ايه ... بجد يا ياسين امك دي احلى حاجه في حياتي .. انا فعلا كنت عايش من غير هدف لحد ما عرفتها .. او بمعنى اصح كان عندي معاني كتييييير اوي لحياتي .. بس لما عرفتها .. المعاني دي كلها بقت معنى واحد .. كفايه انها هي اللي اختارت الأسم ... ممكن ابقى احكيلك الحكايه دي بعدين .. لما اشوفك ان شاء الله

ياسين .. اول حاجه هاعملها لما اشوفك ان شاء الله اني اقرالك الجواب ده .. ممكن تكون سمعته قبل كده .. بس انا عايز اقرأهولك تاني .. عايزك تحس بيه زي ما انا حسس بيه يا ياسين .. ياسين .. ده مش اخر جواب هكتبهولك .. هاكتبلك كتير اوي ان شاء الله ..انا بس عايزك تعرف اني هاعمل كل حاجه عشان اشوفك .. و عشان اجيلك .. هاجي على نفسي يا ياسين عشانك .. عشان انا ما عنديش اغلى منك .. معنديش اغلى منك غير امك يا ياسين ..

ياسين .. انا عايزك تعرف قد ايه انا بحبك .. تخيل الحب ده كله جوايا و انا لسه ما شوفتكش .. كل الحب ده و انت لسه ما اتولدتش .. لسه في علم الغيب ... تخيل لما اشوفك ايه اللي هيحصل .. ؟؟؟ مش عارف يا ياسين ... اللي انا عارفه اني بحبك من دلوقتي .. من قبل ما اشوفك.

بابا.